St. Martin Coop, Kaagapay ng Barangay Tigpalas sa Seguridad at Kaayusan

Isang bago at customized na Barangay Trike Patrol ang inihandog ng St. Martin Coop para sa Barangay Tigpalas, San Miguel, Bulacan. Ang ceremonial turn-over ay ginanap noong ika-2 ng Pebrero 2026, na dinaluhan ng mga pangunahing kinatawan mula sa dalawang panig. Ang mga nagmula sa unang panig ng St. Martin Coop na sina CEO Serafin M. Celestino, Jr., Chief Membership Services and Marketing Officer Nenita DR. Ignacio, San Miguel Branch Manager Sheryl A. Cruz at Membership Services Manager Eileen Ruth G. Reyes at sa ikalawang panig naman mula sa Brangay Tigpalas na sina Kapitan Ma. Fe Pascual, Barangay Secretary, Barangay Treasurer, Hepe ng Barangay, Mga Barangay Tanod at Mother Leaders at iba pang residente ng Barangay Tigpalas.

Nagbigay ng maikli ngunit makabuluhang pananalita sina Membership Services Manager Eileen Reyes at Branch Manager Sheryl Cruz.

Kasunod nito, sa kanyang Turnover Speech, binigyang-diin ni CEO Serafin M. Celestino, Jr. na ito na ang ika-apat na Trike Patrol na ipinagkaloob ng St. Martin Coop sa mga barangay na sakop ng kanilang operasyon. Layunin ng kooperatiba na maglaan ng pondo mula sa Community Development Fund para sa Disaster Risk Reduction and Management (DRRM) ng komunidad. Ang Barangay Trike Patrol ay magsisilbing behikulo sa pagpapanatili ng kapayapaan, katiwasayan, at kaayusan sa Barangay Tigpalas.

Sa kanyang Acceptance Speech, buong puso at malugod na tinanggap ni Barangay Kapitan Ma. Fe Pascual ang kaloob na Trike Patrol. Ipinangako niya na ito ay gagamitin para sa mga pambarangay na aktibidad at makatutulong nang malaki sa kanilang komunidad.